டம்மிஸ் ட்ராமாவின் புதிய நாடகமான மிஸ்டர் ஸ்ட்ரேஞ்சர் ஏப்ரல் 3 முதல் 5 வரை மைலாப்பூர் ஃபைன் ஆர்ட்ஸ் க்ளப்பில் நடந்தேறியது. எழுத்து - இயக்கம்: ஸ்ரீவத்சன்.
டிசைனிங் நிறுவனம் ஒன்றை நடத்தி வரும் தொழில்முனைவர் வைஷ்ணவி. பத்தாண்டுகள் தந்தை சிவராமனை பிரிந்து.. கணவர் மற்றும் மகளுடன் வாழ்ந்து வருபவர்.
எதிர்பாராத நிகழ்வால் தனது வேலையில் அவமானத்தை சந்திக்கும் சிவராமன்.. மகளின் வீட்டிற்கு வந்து சேர்கிறார். இவரது வருகை அக்குடும்பத்தில் பூகம்பத்தை ஏற்படுத்தியதா அல்லது பூ கம்பத்தை நட்டு வைத்ததா என்பதே கதை.
நாடகத்தின் முதல் கால்பகுதி நேரம்.. இக்கதை எதை நோக்கி நகரும் என ஓரிரு அவதானிப்புகள் நம்முள் உருவாகின்றன. ஆனால் 'எதிர்பாராததை எதிர்பாருங்கள்' என முக்கிய திருப்பத்தை வைக்கிறார்
ஸ்ரீவத்சன். அங்கிருந்து இறுதிவரை பரபரவென நகர்கிறது.
நவீன தனியார் நிறுவனத்தின் தலைமைப்பொறுப்பில் உள்ள வைஷ்ணவியாக ப்ரீத்தி. இந்த கேரக்டரை வேறொருவர் ஏற்று நடித்திருந்தால்.. இந்தளவிற்கு கச்சிதமாக நடித்திருக்க இயலாது.
தந்தை சிவராமனாக ஸ்ரீதர். வாழ்வில் சறுக்கல்களையும், அவமானங்களையும் சந்தித்தாலும்.. அவற்றை புறந்தள்ளி.. இயல்பாக அடுத்த செயலை நோக்கி முன்னேறும் மனிதராக மனதை தொடுகிறார்.
நாடகம் பார்க்கிறோம் எனும் எண்ணத்தை மறந்து.. உண்மையான தந்தை - மகள் உரையாடல் மற்றும் உறவினை கண்முன் பார்க்கும் முழுமையான உணர்வை தந்துள்ளனர்.
உத்ரா, விஷ்வேஷ், யக்னேஷ், ஸ்ரீனிவாசன், சராயு உள்ளிட்டோரின் நடிப்பிலும் குறையில்லை.
பொருத்தமான பின்னணி இசையை தந்திருக்கிறார் தக்க்ஷின். மயிலை பாபுவின் ஒளியமைப்பும் நன்று.
மேடைப்பின்னணியை கையாண்ட குழுவினரின் பங்களிப்பும் சிறப்பு.
சுவர் கடிகாரம் வைத்தால்.. காட்சிக்கேற்ற நேரத்தை அதில் மாற்றுவது தலைவலி பிடித்த வேலையென்பதால்.. அதை பல்லாண்டுகளாக நாடகங்களில் தவிர்த்து வந்தனர்.
ஆனால் அதற்கும் தொழில்நுட்பம் மூலம் தீர்வு கண்டு.. மேடைக்கு கொண்டு வந்து அசத்தியுள்ளனர்
இக்குழுவினர்.
கடந்த 25 ஆண்டுகால தமிழ் நாடக வரலாற்றில்.. மறுமலர்ச்சியை உண்டாக்கி.. தனித்துவம் பெற்றது டம்மிஸ் ட்ராமா.
தற்போது மிஸ்டர். ஸ்ட்ரேஞ்சர்.. இக்குழுவின் பெயரை மட்டுமின்றி.. தமிழ் நாடகத்தின் தரத்தையும் அடுத்த கட்டத்திற்கு அழைத்து சென்றுள்ளது.
ஒரே குட்டையில் ஊறிய மட்டைகள் போல.. எந்த genre நாடகமாக இருந்தாலும் அதில் தங்கள் சுயலாபத்திற்காக இந்துத்வா கருத்துகளை திணித்து.. கழுத்தை அறுத்து வரும் பெரும்பான்மையான சபா நாடகங்களுக்கு மத்தியில்....
.... சாதி, மதச்சார்பற்று அனைத்து தரப்பினரும் பார்க்கும்படியான சிறந்த நாடகத்தை தந்து.. பெரிய ஆறுதலை தந்திருக்கிறார் ஸ்ரீவத்சன்.
புதுயுக தலைமுறையினர் பணியாற்றும் அலுவலகங்களின் செயல்பாடுகள், அதனால் ஏற்படும் விளைவுகள் என ஒவ்வொன்றையும் 360 டிகிரியில் ஆராய்ந்து.. அதை பலதரப்பு நாடக ரசிகர்களுக்கும் தெளிவாக கொண்டு சேர்த்திருப்பது மிகச்சிறப்பு.
ஒரு சில கதைக்களங்களை கையாண்டு.. அதை துல்லியமாக நாடமாக்கம் செய்வது ஸ்ரீவத்சனால் மட்டுமே சாத்தியம். அதில் இந்நாடகமும் ஒன்று.
அனைவரும் அவசியம் பார்க்கவும்.
மிஸ்டர் ஸ்ட்ரேஞ்சர் - உங்களில் ஒருவர்.
உங்களுக்காக ஒருவர்.
-----------------------
விமர்சனம்:
சிவகுமார்.
No comments:
Post a Comment