தனிக்கட்சி தொடங்கி தேர்தலை சந்திக்கும் பிரபல நடிகர் ஆல்பர்ட் சிவா.. ரயில் பயணத்தில் திடீரென இறந்து போகிறார். இது விபத்தா அல்லது சதியா என்பதை கண்டறிய விசாரணையை தொடங்குகிறார்கள் போலீஸ் மற்றும் உயர்மட்ட அதிகாரிகள். இவ்விசாரணையை மையமாக கொண்டு சுழல்கிறது கதை.
LED, AI உள்ளிட்ட தொழில்நுட்பம் மற்றும் வந்தே பாரத் ரயில் அமைப்பு ஆகியவை உண்மையான ரயில் பயணத்தை நேரில் பார்க்கும் அனுபவத்தை தருகிறது.
விஷூவல் எஃபெக்ட்ஸ், எடிட்டிங், பின்னணி இசை ஆகியவற்றில் சிறந்த தரத்தை உருவாக்கி இந்நாடகத்தின் நாயகனாக இருக்கிறார் தக்ஷின்.
சைதை குமாரின் அரங்க அமைப்பு மற்றும் மனோ லைட்ஸின் ஒளியமைப்பும் அருமை.
சதீஷ் மற்றும் அக்ஷயா கபூராக வரும் நித்யா ஆகிய இருவரின் நடிப்பும் நன்று.
ரயில்களில் உள்ள பாதுகாப்பு அம்சங்கள் மற்றும் ரயில் பாதையில் ஏற்படும் பிரச்னைகளை தெளிவாக விளக்கி கதையை நகர்த்தியிருக்கிறார் சதீஷ்.
ரயில் ஓட்டுனர்களாக இருக்கும் இரு பெண்களை பார்த்து கேங்மேன் தம்ஸ் ஆப் காட்டியது விசாரணை அதிகாரிக்கு முன்பே தெரியுமாம். ஆனால் அதை ஆற அமர நீண்ட நேரம் கழித்துதான் விசாரிக்கிறார்கள். இதானா சார் உங்க டக்கு? இந்த தாமதமான விசாரணைக்கு சொல்லப்படும் சப்பைக்கட்டும் நம்பும்படியில்லை.
ஆல்பர்ட் சிவா இறந்தது எப்படி? பின்னணியென்ன? எனும் ஆர்வம் உணர்வுபூர்வமாக நம் மனதில் படபடப்பை உண்டாக்காமல்.. இயந்திரத்தனமான விசாரணை காட்சிகளாக மட்டுமே நீண்டிருப்பது முக்கிய குறை.
ஆல்பர்ட் சிவாவின் இறப்பு குறித்த விசாரணையை சிறந்த investigation thriller பாணியில் விறுவிறுப்பாக நடத்தி நாடகத்தை நச்சென்று முடித்திருந்தால் நன்றாக இருந்திருக்கும்.
ஆனால் அதைவிட்டு.. கொய்யா முய்யாவென்று மதம், சாதி, தமிழர் என கிலோமீட்டர் நீளத்திற்கு பிரச்சாரம் செய்து.. காதில் ரத்தம் வரவைத்து நாடகத்தை 'முடித்து விட்டார்' சதீஷ்.
குடும்படாங் - ஆரம்பத்தில் புல்லட் ரயில் வேகம். போகப்போக சாதா ரயில் வேகம்.
------------------------------
விமர்சனம்:
சிவகுமார்.